O Plan de Emprego Local máis social e sostible

A Deputación da Coruña, a través do Plan de Emprego Local, continúa amosando o seu apoio ao tecido empresarial da provincia, co obxectivo de acadar uns maiores niveis de desenvolvemento económico, de calidade no emprego, de benestar social e de cohesión do territorio. Desde a corporación provincial adoptanse medidas que promovan un modelo de desenvolvemento económico que favoreza a capacidade creativa e emprendedora da provincia e sostemento dos negocios, como fonte de riqueza e como elemento esencial para o crecemento, a mellora da competitividade e a modernización do tecido produtivo galego.

O Plan de Emprego Local constitúe unha estratexia integrada de cooperación para o desenvolvemento sostible do territorio, que ten como principal obxectivo fixar poboación nos concellos da provincia e contribuír a un crecemento sostible dos mesmos promovendo a creación de emprego estable e de calidade a nivel local e facilitando a empregabilidade das persoas en situación de desemprego, especialmente no ámbito rural.

No últimos oito anos o PEL investiu na provincia preto de 113 millóns de euros en axudas e proxectos para a mellora da competitividade das pequenas e medianas empresas e a creación directa de máis de 7.000 empregos.