Estás en:Emprego Novas

Valentín González Formoso destaca “o gran potencial emprendedor” da provincia da Coruña na Startup Europe Week

O presidente da Deputación sinalou a utilidade do Plan de Emprego Local, que "axudou a pór en marcha o talento da provincia", apoiando economicamente a máis de 2.000 proxectos de emprendedores

González Formoso tamén valorou a Rede de espazos de Coworking da Deputación, que "favorecen o emprendemento e ofrecen novas oportunidades laborais á xuventude, co obxectivo de que poidan facer a súa vida na súa terra e evitar que o talento galego teña que emigrar"

O encontro celebrado esta mañá no Pazo de Arenaza contou coa presenza do doutor Antonio Hyder, investigador da Universidade de Standford e director de investigación en Hackers & Founders en Palo Alto

Valentín González Formoso destaca “o gran potencial emprendedor” da provincia da Coruña na Startup Europe Week

Valentín González Formoso destacou "o potencial emprendedor" da provincia da Coruña e as oportunidades que ofrece a Deputación a través do seu Plan de Emprego Local (PEL) e da Rede de Espazos de Coworking, pioneira en Galicia, ás emprendedoras e emprendedores coruñeses. Así o sinalou na clausura da xornada dedicada ás startups (empresas de recente creación) organizada pola Deputación na que participou tamén o deputado de Emprego, José Ramón Rioboo.

A xornada desenvólvese no marco da Startup Europe Week, un acontecemento impulsado pola Comisión Europea para fortalecer o ecosistema emprendedor no ámbito local.

O evento tivo lugar esta mañá no Pazo de Arenaza (Oleiros) , un dos espazos de traballo cooperativo da Deputación da Coruña, e nel congregáronse persoas emprendedoras e promotoras de iniciativas empresariais innovadoras e tecnolóxicas como son STGO, OpositaTest, AllGenetics e DromoSport. No acto tamén participou o doutor Antonio Hyder, investigador da Universidade de Standford e director de investigación en Hackers & Founders en Palo Alto (EE.UU).

Valentín González Formoso sinalou no encontro que desde o 2016 a Deputación impulsa a cultura emprendedora a través do seu Plan de Emprego Local (PEL). Unha liña de axudas que permitiu que máis de 2.000 emprendedores e emprendedoras puxeran en marcha os seus negocios, creasen novos postos de traballo e dinamizasen a súa actividade.

Unha Rede Provincial de Coworking para "dar apoio ao talento galego"

Dentro desta aposta e compromiso co emprendemento, o goberno provincial tamén puxo en marcha unha Rede de Espazos de Coworking pioneira en Galicia, coa que se pretende impulsar o emprego nos ámbitos rurais da provincia, así como favorecer e ofrecer oportunidades á mocidade no mundo laboral, "para que poidan facer a súa vida aquí, sen verse na obriga de emigrar", indicou González Formoso, incidindo en que desde o ente provincial se busca "dar apoio ao talento galego".

"Ademais destas iniciativas, a Deputación tamén fomenta as sinerxias entre empresas premiando ás mellores iniciativas empresariais da provincia e organizando eventos como este, no que se pretende fomentar o intercambio de coñecemento e de boas prácticas empresariais", sinalou González Formoso. O presidente provincial sinalou que desde a Deputación "centraremos os nosos esforzos na promoción do rural, do emprendemento da mocidade para que non se vexa na obriga de emigrar". Apostando pola produción tradicional, artesanal e ecolóxica como exemplo de economía circular e do traballo colaborativo, para así xerar emprego de calidade e promover o desenvolvemento socioeconómico da provincia; prioridade transversal para a Deputación.

Nun formato innovador de "world café", as persoas participantes nesta xornada tiveron a ocasión de falar e compartir experiencias cos impulsores destas empresas: Santiago González, CEO e cofundador de STGO; a doutora Alejandra Perina, directora de bioinformática, cofundadora e socia de AllGenetics & Biology S.L.; Jonathan García, CEO e cofundador de Opositatest.com e Olga Pariente, fundadora de Dromo Sport.

Ademais, no encontro tamén estivo o Doutor Antonio Hyder, investigador na Universidade de Stanford e director de investigación científica en Hackers &Founders (Palo Alto, EE.UU.), que abordou o desenvolvemento de ecosistemas tecnolóxicos e científico no territorio.

Páxinas suxeridas
Visítanos en   Chámanos ao 981 080 509, escríbenos a  pel@dacoruna.gal , realiza unha consulta (formulario) ou solicita unha cita presencial X