As solicitudes para o financiamento de persoal das oficinas de turismo poderán presentarse ata o 19 de febreiro
A Deputación inviste este ano 800.000 euros nunha liña de axudas destinada a concellos de menos de 50.000 habitantes, que recibirán entre 10.000 e 20.000 €
Ata as 14 horas do próximo 19 de febreiro estará aberto o prazo de presentación de solicitudes ás axudas que a Deputación da Coruña destina en 2022 para o financiamento do gasto de persoal das oficinas de turismo dos concellos e agrupacións de municipios da provincia de menos de 50.000 habitantes. A institución provincial inviste este ano 800.000, cun mínimo de 10.000 e un máximo 20.000 € por beneficiario.
Desde 2017, a liña de subvencións da Deputación para a contratación de persoal especialista en turismo dálle traballo no ámbito territorial da provincia a 53 persoas e tamén servizo a un total de 62 entidades municipais.
"Un turismo de calidade", explica o vicepresidente provincial e responsable do departamento de Turismo, Xosé Regueira, "precisa de bos técnicos para planificar e de bo persoal que proporcione a mellor información". "O concellos", engade, "teñen necesidade de persoal especializado en turismo para ofrecer un servizo a unha proposta de calidade, e para iso é importante que ofrezamos este tipo de subvencións coas que seremos, seguro, competitivos no futuro".
Para Regueira, "é necesario planificar recursos e estruturar o produto, e para iso van ser imprescindibles as persoas que saen formadas das universidades en materia turística".
As solicitudes deberán presentaranse, de xeito telemático, na sede electrónica da Deputación da Coruña, a través da plataforma de subvencións da Deputación (SUBtel).