Estás en:Emprego Novas

A Deputación participa na entrega de diplomas dos primeiros cursos formativos do coworking A Fusquenlla de Moeche

O deputado de Emprego, José Ramón Rioboo, asistiu ao acto xunto coa alcaldesa de Moeche e outros alcaldes da zona 

A Deputación participa na entrega de diplomas dos primeiros cursos formativos do coworking A Fusquenlla de Moeche

A Nave do Mercado de Moeche acolleu esta mañá o acto oficial de clausura dos dous cursos impartidos até o momento no Centro de Transformación Agroalimentaria A Fusquenlla, un dos once centros da Rede Provincial de Espazos de Coworking da Deputación da Coruña, nos que participaron un total de 33 persoas co obxectivo de formarse na preparación de conservas e zumes, ademais de aprender o manexo do equipamento dispoñible nas instalacións.

No encontro entregáronse os diplomas correspondentes ás accións formativas, coa asistencia dunha representación de todas as administracións implicadas no proxecto dun modo ou doutro: os concellos de Moeche, San Sadurniño, Cerdido e Valdoviño, a Deputación da Coruña e a Consellería do Medio Rural. Todas elas ratificaron o seu compromiso de seguir apoiando esta iniciativa pioneira na comarca, que agora, de cara a 2023, ten marcada a prioridade de empezar a funcionar de maneira autoxestionada e de ofrecer máis cursos, para os que hai nestes momentos 43 persoas en lista de agarda. 

O deputado de Emprego, José Ramón Rioboo, insistiu en que a Deputación da Coruña seguirá colaborando nun proxecto "que se identifica coa calidade dos nosos produtos, coa nosa terra e co noso modo de vida no entorno rural". Rioboo lembrou, ademais, que A Fusquenlla forma parte da rede de espazos de traballo colaborativo da Deputación e que, nese marco, a intención do seu departamento é continuar proporcionando recursos "para máis formación ou para emprendemento".

A alcaldesa de Moeche, Beatriz Bascoy, referiuse tamén á posta en marcha do centro, "que non sería posible sen a unión dos concellos e sen o financiamento da Deputación, dos fondos Leader e da AGACAL". "Son moitos pasos os que hai que dar e é difícil, pero é unha oportunidade e unha aposta real pola xente do rural", dixo a rexedora. Bascoy reiterou a felicitación ás persoas participantes nos cursos realizados durante o verán e comezos do outono e convidounas a sumarse cos seus produtos ao mercado que se desenvolve os sábados en San Ramón, "un mercado pequeniño pero que xa leva cinco anos funcionando con produto de proximidade".

Visítanos en   Chámanos ao 981 080 509, escríbenos a  pel@dacoruna.gal , realiza unha consulta (formulario) ou solicita unha cita presencial X