A Deputación introduce melloras nas obras da estrada do Confurco a Orro, en Culleredo

A área de Vías e Obras da Deputación da Coruña traballa na redacción dun proxecto reformado das obras de ampliación e mellora da seguridade da estrada provincial DP 0510 do Confurco a Orro, no termo municipal de Culleredo.

Co avance das obras detectáronse necesidades que non estaban incluídas no proxecto orixinal e que serán cubertas con este novo reformado, co obxecto de garantir unha maior seguridade viaria na zona e unha mellor execución dos traballos. A Deputación pretende levar a aprobación deste reformado ao pleno do vindeiro mes de decembro.

O reformado suporá un investimento adicional duns 230.000 euros a maiores dos 1.671.420 euros nos que se adxudicou a obra e terá como obxecto regularizar a calzada actual, deformada en algunhas zonas, así como mellorar o peralte da nova estrada, para o que será necesario un reforzo da pavimentación prevista con mestura bituminosa en quente.

Unha vez iniciados os traballos de excavacións detectouse tamén a necesidade de sanear zonas de explanada onde o material existente non é válido para executar as capas de firme proxectadas, así como a execución de pequenas contencións de formigón non previstas no proxecto inicial. As obras incluirán o traslado provisional dos puntos de luz mentres non se coloca o alumeado definitivo e melloras no alumeado previsto na rotonda do PK 2+000.

As obras da estrada DP 0510 inclúen a ampliación da plataforma do vial de 5 a 7 metros, a mellora do trazado e a construción dunha senda para mellorar a seguridade peonil, ademais da renovación completa da rede de saneamento, financiada polo concello con 250.317 euros, e que se executa simultaneamente coas obras da vía.

As obras supoñen a mellora da estrada desde o seu comezo, na intersección coa tamén vía provincial DP3109, ata o punto quilométrico 2+940, mellorando o acceso aos núcleos de Figueiras e Caiñás, e as diversas vivendas situadas neste tramo de preto de 3 quilómetros.

Co obxectivo de favorecer o tránsito dos viandantes entre os diversos inmobles que se sitúan a ambas marxes da estrada, tamén se construirá unha senda peonil de dous metros de ancho ao longo da totalidade da estrada. Ademais, nas zonas onde o ancho da vía o permite, aproveitarase para a creación dun aparcamento en batería.

O proxecto tamén prevé a mellora dos accesos e interseccións, a modificación das curvas con radio moi reducido e a execución dunha nova glorieta á altura do punto quilométrico 2+000, co fin de favorecer os cambios de sentido e de eliminar os puntos con alta perigosidade tanto para o tráfico rodado coma para os viandantes.