A Deputación organiza actividades divulgativas e deportivas para celebrar o segundo aniversario da Vía Verde Compostela-Tambre-Lengüelle
Cerceda acolle o xoves unhas xornadas nas que se explicará o impacto turístico e económico da Vía Verde no territorio e responsables doutras Vías Verdes en España contarán as súas experiencias de éxito
O 19 de outubro, a Deputación organiza a I Carreira Camiños da Vía Verde, que xa conta conta con máis de 300 persoas inscritas
Con motivo do segundo aniversario da posta en marcha dos tramos da Vía Verde entre Cerceda e Oroso, a Deputación da Coruña organiza durante este mes distintas actividades culturais, divulgativas e deportivas que contribuirán a dinamizar esta ruta.
Con 26 quilómetros de lonxitude a través dos concellos de Cerceda, Tordoia, Ordes e Oroso, a Vía Verde Compostela-Tambre-Lengüelle é a día de hoxe a maior Vía Verde de Galicia, e crecerá aínda máis cos 10 quilómetros do tramo de Santiago de Compostela, cuxas obras se iniciaron o pasado mes de setembro e prevese que estean completadas ao longo de 2025, marcando un novo fito coa conexión da capital de Galicia.
Para explicar o impacto turístico, social e económico da Vía Verde, a Deputación da Coruña organiza o xoves, 3 de outubro, no albergue da estación de Cerceda unha xornada baixo o título "Da vía férrea á Vía Verde", na que participará a directora da Asociación Europea de Vías Verdes, Mercedes Muñoz e a xerente das Vías Verdes na Fundación Española de Ferrocarriles, Arantxa Hernández, entre outros relatores.
Ademais, os responsables das vías verdes de Montes de Hierro (Vizcaya) e Plazaola (Navarra) explicarán as súas experiencias de éxito no eido da promoción turística e a mobilidade sustentable nos seus territorios.
Carreira da Vía Verde o 19 de outubro
A Vía Verde será tamén protagonista, o vindeiro 19 de outubro, da I Carreira Camiños da Vía Verde, unha proba de atletismo en ruta que organiza a Deputación da Coruña en colaboración coa Asociación de Concellos da Vía Verde Compostela-Tambre-Lengüelle e o Club Atletismo Tambre.
O evento está deseñado para a participación de todos os públicos, polo que constará de diferentes probas e distancias. Haberá unha carreira de 10 quilómetros, outra de 2 quilómetros e unha de 1 quilómetro. Para os máis pequenos a distancia será de 400 metros. E, por outra banda, terá lugar unha atractiva andaina popular de cinco quilómetros en ruta.
Máis de 300 persoas inscribíronse xa na carreira. A inscrición é gratuíta e permanece aberta na web www.carreirasgalegas.com.
O deputado de Deportes, Antonio Leira, lembrou o "gran potencial turístico e ambiental da maior Vía Verde de Galicia, e ademais un escenario idóneo para a unha proba deportiva coma esta, pensada para facela accesible a todos os públicos e idades".