O Laboratorio Ecosocial do Barbanza: un modelo pioneiro de desenvolvemento sostible e colaboración comunitaria en Casa RIA

A Casa RIA acolle unha exposición única que recolle seis anos de traballo do Laboratorio Ecosocial do Barbanza, un proxecto pioneiro que está a transformar a xestión territorial e o futuro sostible desta comarca coruñesa.

A mostra, que se inaugurou hoxe xoves 16 de outubro, contou coa presenza da deputada provincial de Industria, Empresa, Medio Ambiente, Emprego e Política Demográfica, Rosa Ana García, e amosa como a colaboración entre entidades, administracións e comunidades locais pode xerar un modelo de desenvolvemento rural máis verde, inclusivo e participativo.

A exposición, titulada "Laboratorio Ecosocial do Barbanza. Un laboratorio vivo para a xestión multifuncional e a custodia colectiva do territorio", convida o público a descubrir como este proxecto —apoiado pola Fundación Biodiversidad do Ministerio para a Transición Ecolóxica e o Reto Demográfico (MITECO) e financiado pola Unión Europea – NextGenerationEU— foi quen de integrar acción comunitaria, planificación territorial e innovación ambiental para crear novas oportunidades no medio rural.

O poder da cooperación para transformar o territorio

A mostra vai máis alá de exhibir resultados: presenta o Laboratorio Ecosocial do Barbanza como un modelo de cooperación e gobernanza compartida que demostra o potencial da colaboración entre comunidades de montes, universidades, administracións públicas e expertos.

O proxecto aborda desafíos tan relevantes como a rexeneración de zonas en abandono, a prevención de incendios forestais, a valorización dos recursos locais ou a creación de emprego verde, integrando saber tradicional e innovación científica.

A través de paneis, fotografías e materiais audiovisuais, os visitantes poderán coñecer de preto un proxecto que aposta por un modelo de desenvolvemento multifuncional e sostible, centrado nas persoas e adaptado ás necesidades do territorio.

Baroña: a transformación dos produtos locais como motor de futuro

Un dos piares do proxecto é o centro de transformación agroalimentaria de Baroña, actualmente en desenvolvemento, que se concibe como un espazo de encontro, formación e innovación para os pequenos produtores do Barbanza. Este centro permitirá mellorar a competitividade dos produtos da terra e do mar, abrir novas canles de comercialización e xerar novas oportunidades laborais no ámbito rural.

A Deputación da Coruña, que achegou 160.000 euros para apoiar esta iniciativa, destaca o carácter exemplar do proxecto e a súa capacidade para integrar sustentabilidade, innovación e economía local. "Queremos que o modelo do Barbanza se converta nun referente para outros territorios que buscan reinventarse desde o respecto á natureza e á comunidade", sinalou a deputada Rosa Ana García.

Un futuro sostible para o Barbanza e para Galicia

A exposición en Casa RIA poderá visitarse ata o 24 de xaneiro de 2026, e irá acompañada dun programa de actividades paralelas que afondarán nos principais temas do proxecto: a xestión comunitaria do territorio, o uso de madeira local en construción, a gandería rexenerativa ou a transición cara a economías rurais máis resilientes.

O Laboratorio Ecosocial do Barbanza é hoxe un exemplo de como as alianzas estratéxicas entre entidades públicas, privadas e sociais poden transformar un territorio de maneira integral.
Ademais de fomentar a sustentabilidade e a innovación, o proxecto contribúe a crear emprego, fixar poboación e mellorar a calidade de vida das comunidades rurais, abrindo camiños cara a un futuro máis sostible, solidario e próspero.