Aprobada a xornada de 35 horas semanais para o persoal

Na Mesa Xeral de Negociación celebrada hoxe, 22 de maio de 2026, aprobáronse as Bases Xerais reguladoras dos procesos selectivos derivados da OEP 2025, o Regulamento da selección de persoal temporal, as instrucións sobre xornada e horarios e a resolución que determina o horario a realizar nos postos de xornada especial.

Aprobada a xornada de 35 horas semanais para o persoal. A Corporación presentou o acordo polo que se ditan instrucións sobre xornada e horarios de traballo do persoal na liña do aprobado recentemente en Madrid para a Administración Xeral do Estado (AXE). Ademais da xornada de 35 horas semanais, que se establece de xeito xeral para todo o persoal agás aquel que este en réxime de especial dedicación que pasa a ser de 37,5 h., resulta salientable o establecemento dunha bolsa de horas para conciliación de ata o 5% da xornada anual, a utilización destas horas terá carácter recuperable nun prazo máximo de tres meses (neste punto CCOO conseguiu mellorar o texto inicial que, tal e como recolle a instrución da AXE, só permitía a utilización da bolsa ao persoal para o coidado de menores a cargo o persoas maiores ou dependentes de primeiro grado de consanguinidade ou afinidade. Agora tamén pode acceder todo o persoal que teña que realizar coidados de persoas convivintes ou ata segundo grado de consanguinidade ou afinidade). Tamén cabe subliñar o incremento da flexibilidade horaria: a partir de agora o horario obrigatorio durante todo o ano será de 9:00 a 14:00 h., podéndose completar a xornada dende as 7:00 ata as 20:00 h. de luns a venres e de 9:00 a 14.00 o sábado (neste punto CCOO negociou coa Corporación que se puidese completar a xornada o venres pola tarde e o sábado pola mañá como tiñamos anteriormente porque o documento presentado en mesa, ao igual que a instrución da AXE, non os incorporaba).

A redución dunha hora na xornada de verán dende o 1 de xuño e o establecemento da mesma redución nos períodos no lectivos declarados pola Xunta son algunhas das melloras acadadas por CCOO. A primeira das medidas xurde como unha mellora sobre a instrución da AXE que establece a ampliación do período de xornada de verán do 15 ao 1 de xuño tan só para o persoal que dispón de conciliación. Neste sentido, no seno do diálogo previo que mantivemos coa Corporación unha vez que o Ministerio publicou a devandita instrución, CCOO propuxo que a dita ampliación se aplicase a todo o persoal, medida que a Corporación considerou oportuna e por tanto xa incorporou no documento que levou a mesa. O problema foi que, seguindo a instrución da AGE, a dita redución era de só ½ h. e así aparecía recollido no documento que foi a mesa, polo que CCOO negociou coa Corporación, ao igual que fixeron outros sindicatos, para que no se perdesen dereitos xa consolidados. Así, o texto definitivo recolle a redución dunha hora na xornada de verán como ata agora. O mesmo aconteceu coa incorporación no documento final da redución dunha hora nos períodos non lectivos declarados pola Xunta para favorecer a conciliación da vida, familiar e laboral, logros acadados por CCOO anos atrás en diversas negociacións.

Por fin se aproba o novo regulamento de selección de persoal. Aínda que hai cousas que non nos gustan e consideramos superior o regulamento presentado por CCOO, CIG e UGT o ano pasado, priorizamos a súa inmediata aprobación polas grandes melloras que supón en relación co vixente. De feito CCOO estaba disposta a aprobar o documento levado a mesa de negociación o pasado de 10 de marzo, como demandaba a maioría do persoal interino, con todo a Corporación decidiu pospoñer a súa aprobación debido aos reparos que presentaron algunhas centrais sindicais.