Estás en:Emprego Novas

A Deputación da Coruña organiza unha nova edición dos cursos de defensa persoal feminina en oito concellos da provincia

Aranga, Lousame, Tordoia, Vimianzo, Valdoviño, Ponteceso, Santiso e Betanzos serán sede dos cursos en 2023

O ano pasado participaron 418 mulleres

As participantes poderán aprender técnicas de autodefensa e protocolos de actuación ante posibles situacións de perigo

A Deputación da Coruña organiza unha nova edición dos cursos de defensa persoal feminina en oito concellos da provincia

A Deputación da Coruña organiza unha nova edición dos cursos de defensa persoal feminina, que se celebrarán en oito concellos da provincia desde febreiro ata xuño.

Segundo explicou a deputada de Deportes, Cristina Capelán, as participantes terán a oportunidade de aprender e ensaiar técnicas de autodefensa e protocolos de actuación ante unha posible situación de perigo. Capelán destacou a elevada asistencia que rexistraron os cursos do ano pasado, aos que asistiron 418 mulleres en oito municipios.

O prazo de inscrición para o primeiro curso, que terá lugar en Aranga, abre este próximo luns, 30 de xaneiro, aínda que o seminario terá lugar o sábado 18 de febreiro.

Será un dos oito seminarios que organiza a institución provincial ata o mes de xuño. Os restantes realizaranse en Lousame o 4 de marzo, en Tordoia o 8 de abril, en Vimianzo o 22 de abril, en Valdoviño o 6 de maio, en Ponteceso o 20 de maio, en Santiso o 3 de xuño e en Betanzos o 10 de xuño.

Os cursos, que son de balde, están dirixidos a persoas de 14 a 65 anos empadroadas en calquera concello da provincia da Coruña. Durante as clases poderán aprender técnicas de autodefensa e protocolos de actuación no ámbito da defensa persoal, ademais de incrementar o autocontrol en situacións de estrés. Os seminarios celebraranse os sábados en horario de mañá, de 10 a 14 horas.

O número de prazas delimitado para cada unha das edicións é de 75 persoas

Visítanos en   Chámanos ao 981 080 509, escríbenos a  pel@dacoruna.gal , realiza unha consulta (formulario) ou solicita unha cita presencial X