O deputado de Deportes visita ao Oroso Pádel Club feminino, flamante campión galego que representará a Galicia no Máster Internacional de Valencia
As deportistas viaxan hoxe a Valencia, onde se disputa esta fin de semana unha proba que reunirá aos mellores equipos de España e outros países
O deputado provincial de Deportes, Antonio Leira, visitou onte ao equipo feminino do Oroso Pádel Club para felicitalas polos seus recentes éxitos deportivos e trasladarlles o apoio da Deputación da Coruña antes da súa participación no Máster Internacional de 500 e Future, que se celebra esta fin de semana en Valencia.
O equipo vén de proclamarse campión de Galicia na categoría Future, facendo historia ao converterse no primeiro equipo do club en acadar este título. Como campioas autonómicas, as deportistas representarán a Galicia no Máster Internacional, onde competirán cos mellores equipos de todo o Estado e tamén con equipos doutros países como Portugal, Italia e Suecia.
Durante a visita, o deputado desexoulles sorte nesta nova etapa competitiva e expresou "o orgullo que supón para toda a provincia e para o deporte galego que un equipo como o de Oroso leve o nome de Galicia tan alto". Leira destacou tamén o papel da Deputación como un dos principais patrocinadores institucionais do equipo e puxo en valor "o esforzo, o compromiso e a traxectoria meteórica dun grupo de xogadoras que en apenas dous anos conseguiron un fito histórico".
O equipo feminino do Oroso Pádel Club iniciou a súa andaina na competición hai só un ano e medio, comezando na cuarta división de Future, o grupo máis baixo da categoría. Tras unha primeira tempada impecable, conseguiron o ascenso e, xa na presente campaña 2024/2025, lograron situarse na primeira división, rematando como líderes da Fase Regular Zonal de Future Galicia Norte e proclamándose campioas galegas tras vencer tamén na Fase Interseries entre os mellores equipos do norte e sur de Galicia.
Todo isto mentres lideran tamén a Liga Galega por Equipos de Clubes, coa vista posta noutro posible ascenso.
O club e, especialmente, o seu equipo feminino, quixeron agradecer publicamente o apoio recibido por parte da súa afección e da Deputación da Coruña ao longo deste intenso e exitoso percorrido